Конда́к 1
Возбра́нной Воево́де и преди́вной Засту́пнице ро́да христиа́нскаго, благоизво́лившей от святы́я Своея́ белы́ничския ико́ны излива́ти на́м струи́ благода́тных исцеле́ний, похва́льная воспису́ем Ти́ раби́ Твои́, Богоро́дице. Ты́ же, я́ко блага́я засту́пница чту́щих Тя́ христиа́н страны́ на́шея, от вся́ких на́с бе́д свободи́ да зове́м Ти́:
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
И́кос 1
А́нгел с небесе́ по́слан бы́сть рещи́ Богоро́дице: Ра́дуйся! Мы́ же, земноро́днии, дивя́щеся воплоще́нию от Тебе́ Сы́на Твоего́ и Бо́га на́шего, дерза́ем воспева́ти Тебе́ си́це:
Ра́дуйся, благода́тная Богоро́дице Де́во;
Ра́дуйся, преблагослове́нная в жена́х.
Ра́дуйся, я́ко Спа́са родила́ еси́ ду́ш на́ших;
Ра́дуйся, я́ко Свободи́теля яви́ла еси́ на́м.
Ра́дуйся, небесе́ и земли́ Цари́це;
Ра́дуйся, я́ко превы́шши еси́ вся́каго созда́ния.
Ра́дуйся, А́нгелы на небеси́ чти́мая;
Ра́дуйся, челове́ки на земли́ прославля́емая.
Ра́дуйся, я́ко прише́дши ко Елисаве́те, Сама́ прорекла́ еси́: «Отны́не ублажа́т Мя́ вси́ ро́ди»;
Ра́дуйся, я́ко вои́стинну вси́ ро́ди доны́не Тя́ непреста́нно ублажа́ют.
Ра́дуйся, ве́рно Тя́ велича́ющим по́мощь ско́рую да́рующая;
Ра́дуйся, чудотво́рными Свои́ми ико́нами, я́ко со́лнцем, светя́щая.
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
Конда́к 2
Ви́дящи, всеблага́я Влады́чице, с высоты́ свята́го жили́ща Своего́ ско́рбь и тесноту́ жития́ на́шего в стране́ на́шей, восхоте́ла еси́ яви́ти зде́ сла́ву Твою́, чудотво́рным о́бразом Твои́м подаю́щи скорбя́щим утеше́ние, боля́щим исцеле́ние, бе́дствующим по́мощь, да ви́дяще такову́ю ми́лость Твою́ к на́м, благода́рными усты́ воспева́ем вси́ Бо́гу: Аллилу́ия.
И́кос 2
Разуме́ти хотя́ще ди́вное чу́до, ка́ко от святы́я Твоея́ ико́ны исхожда́ху светя́щияся лучи́, боголюби́вии и́ноцы, прине́сше святы́й о́браз Тво́й в страну́ на́шу и поста́вивше в це́ркви проро́ка Илии́, егда́ от пресве́тлых луче́й си́х в нощи́ бы́сть све́тло а́ки во дни́, со стра́хом и тре́петом соверша́ху всено́щное моле́ние пред свято́ю Твое́ю ико́ною и укрепля́хуся наде́ждою на милосе́рдие Бо́жие. Ты́ же, о́крест живу́щим лю́дем яви́вши исто́чник благода́тных исцеле́ний, научи́ла еси́ вопи́ти Тебе́ си́це:
Ра́дуйся, све́тлыя бе́лыя но́чи и́ноком яви́вшая;
Ра́дуйся, я́ко сего́ ра́ди и село́ то́ нарече́ся Белы́ничи.
Ра́дуйся, Све́т неизрече́нно роди́вшая;
Ра́дуйся, я́ко от Тебе́ возсия́ Со́лнце пра́вды Христо́с Бо́г на́ш.
Ра́дуйся, сия́нием Свои́м мра́к неве́рия разгоня́ющая;
Ра́дуйся, просвети́вшая вся́каго челове́ка, спасе́ния получи́ти хотя́щаго.
Ра́дуйся, све́том Твои́м ско́рбный мра́к души́ прогоня́ющая;
Ра́дуйся, вся́ концы́ земли́ просвеща́ющая.
Ра́дуйся, звездо́ явля́ющая Со́лнце;
Ра́дуйся, Ма́ти незаходи́маго Све́та.
Ра́дуйся, луно́, сия́ющая в нощи́ грехо́вней блужда́ющим;
Ра́дуйся, сто́лпе о́гненный, пу́ть жи́зни ве́чныя на́м показу́ющий.
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
Конда́к 3
Си́ла Вы́шняго осеня́ет вся́каго челове́ка, с ве́рою притека́ющаго к Твое́й цельбоно́сней ико́не, ю́же дарова́ла еси́ лю́дем на утеше́ние. Сего́ ра́ди и мы́, со умиле́нием взира́юще на святы́й Тво́й о́браз, я́ко живе́й Ти́ су́щей из глубины́ се́рдца вопие́м: осени́ и на́с си́рых и безпомо́щных, да воспое́м прославля́ющему Тя́ Го́споду: Аллилу́ия.
И́кос 3
Имы́й благо́е попече́ние о лю́дех благосе́рдый Госпо́дь, попусти́ ико́не Твое́й святе́й оста́вити на вре́мя не́кое хра́м Правосла́вныя Це́ркве, егда́ кармели́тстии мона́си, взе́мше Тво́й святы́й о́браз, поста́виша его́ в лати́нстем свое́м хра́ме. Ты́ же и зде́ яви́ла еси́ то́ки благода́тных чуде́с Твои́х, да позна́ют вси́ христиа́не, ко́ль си́льна е́сть по́мощь Богома́тере. Егда́ же испо́лнися сие́ смотре́ние о лю́дех, благоволи́ Госпо́дь возврати́ти о́браз Тво́й святы́й правосла́вным лю́дем, да с ра́достию воспева́ют Ти́ си́це:
Ра́дуйся, все́х христиа́н помо́щнице;
Ра́дуйся, Правосла́вныя Це́ркве сла́во и утеше́ние.
Ра́дуйся, я́ко отрокови́цею вошла́ еси́ в хра́м Госпо́день;
Ра́дуйся, я́ко во хра́ме воспита́лася еси́.
Ра́дуйся, святы́х хра́мов пе́рвейшее украше́ние;
Ра́дуйся, я́ко и Сама́ соде́лалася еси́ хра́м Сы́на Бо́жия.
Ра́дуйся, в четыредеся́тый де́нь о́трока Иису́са в хра́м Бо́жий прине́сшая;
Ра́дуйся, я́ко сбы́ся предрече́нное Тебе́ во хра́ме Симео́ном Богоприи́мцем.
Ра́дуйся, лю́бящая все́х чту́щих хра́мы Бо́жия;
Ра́дуйся, святы́х хра́мов тве́рдое огражде́ние.
Ра́дуйся, я́ко во хра́ме на небеси́ ве́чно ца́рствуеши;
Ра́дуйся, я́ко ве́рныя в хра́м се́й ввести́ тщи́шися.
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
Конда́к 4
Недоумева́ет у́м на́ш, ка́ко досто́йно е́сть восхваля́ти чудеса́ Твоя́, Пресвята́я Богоро́дице, я́же оби́льно источи́ла еси́ от цельбоно́сныя ико́ны Твоея́. Ты́ бо хромы́х еси́ хожде́ние, слепы́х прозре́ние, боля́щих исцеле́ние, во́инов на по́ле бра́ни ве́рная защи́тница. Сего́ ра́ди, прославля́юще неисче́тная Твоя́ чудеса́, велегла́сно пое́м Бо́гу: Аллилу́ия.
И́кос 4
Слы́шав о вели́ких чудесе́х, излива́емых от белы́ничския Твоея́ ико́ны, ра́б Тво́й Васи́лий восхоте́ послужи́ти Ти́ и даде́ обе́т пребы́ти в послуша́нии монасты́рстем при хра́ме Твое́м, но не испо́лнив до конца́, возврати́ся в ми́р. Ты́ же, хотя́щи вразуми́ти его́, наказа́ла еси́ лю́тою боле́знию, о́н же, возлежа́ на одре́ сме́ртнем, позна́ сво́й гре́х, принесе́ Бо́гу покая́ние и, воста́в от одра́ боле́зни, возврати́ся в монасты́рь и науча́ше все́х вопи́ти Тебе́ си́це:
Ра́дуйся, обе́т Го́сподеви да́вшая;
Ра́дуйся, до конца́ его́ соблю́дшая.
Ра́дуйся, де́вство и рождество́ сочета́вшая;
Ра́дуйся, я́ко по рождестве́ пребыла́ еси́ Де́ва непоро́чная.
Ра́дуйся, до́брыя обе́ты прие́млющая;
Ра́дуйся, не соблюда́ющих обе́ты наказу́ющая.
Ра́дуйся, покрови́тельнице притека́ющих к Тебе́ по обе́ту пало́мников;
Ра́дуйся, ми́лости да́рующая.
Ра́дуйся, благи́м наме́рением спосо́бствующая;
Ра́дуйся, зла́я начина́ния разруша́ющая.
Ра́дуйся, во дни́ земна́го стра́нствия на́шего до́брая путеводи́тельнице;
Ра́дуйся, к ти́хому приста́нищу на́с приводя́щая.
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
Конда́к 5
Я́ко лучеза́рная звезда́ возсия́ в стране́ на́шей свята́я Твоя́ чудотво́рная ико́на, Богоро́дице Де́во. Мы́ же, озаря́емии сия́нием пресве́тлых чуде́с Твои́х, преклоня́юще коле́на се́рдца, вопие́м исто́чнику чуде́с Бо́гу: Аллилу́ия.
И́кос 5
Ви́дя, я́ко тще́тна е́сть по́мощь враче́й земны́х, исцели́ти боля́щую но́гу не могу́щих, боголюби́вый диа́кон Иоа́нн нача́т возноси́ти усе́рдныя моли́твы ко Врачу́ небе́сному. Получи́в же во сне́ повеле́ние от святи́теля чудотво́рца Никола́я призва́ти в по́мощь Тя́, Богоро́дице, поспеши́ в хра́м Тво́й, ко свято́му о́бразу Твоему́ и, соверши́в пред ни́м усе́рдное моле́бное пе́ние, испове́да грехи́ своя́ вся́. Егда́ же сподо́бися прия́ти Святы́х Боже́ственных Та́ин, получи́ исцеле́ние боля́щия ноги́ своея́. Сего́ ра́ди и мы́ немощни́и, наде́ящеся на Твою́ всеси́льную по́мощь, дерза́ем воспева́ти Ти́:
Ра́дуйся, немощны́м здра́вие да́рующая;
Ра́дуйся, цели́тельнице вся́кия боле́зни.
Ра́дуйся, оста́вленных врачми́ под Сво́й покро́в прие́млющая;
Ра́дуйся, исцеле́ние и́м подаю́щая.
Ра́дуйся, о́гнь лю́тыя боле́зни утоля́ющая;
Ра́дуйся, от одра́ сме́ртнаго возставля́ющая.
Ра́дуйся, ненаде́янным наде́яние;
Ра́дуйся, упова́ние на́ше непосты́дное.
Ра́дуйся, не́мощи душе́вныя врачу́ющая;
Ра́дуйся, гре́шников на пу́ть пра́вый наставля́ющая.
Ра́дуйся, грехо́вную отъе́млющая скве́рну;
Ра́дуйся, ба́не омыва́ющая со́весть.
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
Конда́к 6
Предстоя́ще пред Твои́м о́бразом, архиере́ев сосло́вие, свяще́нницы, мона́си и вси́ лю́дие пропове́дуют неизче́тная Твоя́ благодея́ния, я́же оби́льно излива́еши от святы́я Твоея́ ико́ны. Сего́ ра́ди и мы́, гре́шнии, предстоя́ще ны́не пред чудотво́рным Твои́м о́бразом, ве́руем и наде́емся, я́ко испро́сиши вся́ блага́я и поле́зная на́м у Сы́на Твоего́ и Бо́га на́шего, Ему́же дерзнове́нно вопие́м: Аллилу́ия.
И́кос 6
Возсия́ благода́ть от святы́я Твоея́ ико́ны, ю́же я́ве узре́ боголюби́вый во́ин Никола́й, егда́ ко́ни влача́ху его́ по земли́, о́н же, че́стно изба́вився Тобо́ю от ве́рныя сме́рти, научи́ на́с Ти́ вопи́ти похвалы́ сия́:
Ра́дуйся, от напра́сныя сме́рти спаса́ющая;
Ра́дуйся, от греха́ сме́ртнаго избавля́ющая.
Ра́дуйся, Нача́льника живота́ и сме́рти ро́ждшая;
Ра́дуйся, Ма́ти Живота́, сме́рть умертви́вшая.
Ра́дуйся, я́ко в ча́с сме́рти Своея́ ти́хо возлегла́ еси́ на одре́ Свое́м;
Ра́дуйся, я́ко Сы́н Тво́й и Бо́г на́ш кро́тко ду́шу Твою́ от те́ла отдели́.
Ра́дуйся, я́ко с те́лом взята́ была́ еси́ на не́бо:
Ра́дуйся, я́ко по сме́рти жива́ еси́.
Ра́дуйся, непосты́дную кончи́ну на́м да́рующая;
Ра́дуйся, в ча́с кончи́ны на́шея на́с заступа́ющая.
Ра́дуйся, и по сме́рти на́с не оставля́ющая;
Ра́дуйся, от возду́шных мыта́рств спаса́ющая.
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
Конда́к 7
Хотя́ще досто́йно почти́ти сла́ву пресвята́го Твоего́ о́браза, святи́тель Могиле́вския це́ркве и боголюби́вии лю́дие обы́чай прия́ша приноси́ти святу́ю Твою́ чудотво́рную ико́ну в богоспаса́емый гра́д Могиле́в, иде́же вси́ с ра́достию несказа́нною срета́ют ю́, с ве́рою и любо́вию прие́млют в до́мы своя́. В ко́еждо ле́то же, обтека́ющи чудотво́рным си́м о́бразом гра́ды и ве́си страны́ на́шея, подае́ши лю́дем благода́тное утеше́ние и ско́рую по́мощь, подвиза́ющи воспева́ти все́х Бо́гу: Аллилу́ия.
И́кос 7
Но́вое чу́до дарова́ла еси́, Де́во Богоро́дице, от цельбоно́сныя ико́ны Своея́, егда́ сы́н иере́я Бо́жия Константи́н разболе́ся очи́ма и еди́но о́ко его́ пораже́но бы́сть слепото́ю. Прите́к же с ма́терию свое́ю на поклоне́ние к чудотво́рному Твоему́ о́бразу и соверши́в моле́бное пе́ние пред ни́м, соверше́нное прозре́ние получи́. Просвети́, о, Преблага́я Влады́чице, и на́ши серде́чнии о́чи, да воспева́ем Ти́ си́це:
Ра́дуйся, от ослепле́ния на́с сохраня́ющая;
Ра́дуйся, слепы́м зре́ние да́рующая.
Ра́дуйся, очи́ма ве́ры и наде́жды на Тя́ взира́ющим помога́ющая;
Ра́дуйся, о́чи на́ши серде́чнии просвеща́ющая.
Ра́дуйся, ослепле́нных грехо́м неве́рия наказу́ющая;
Ра́дуйся, заблу́дшим и ослепле́нным пу́ть пра́вый показу́ющая.
Ра́дуйся, от па́губных ересе́й отвраща́ющая;
Ра́дуйся, ко и́стинней ве́ре приводя́щая.
Ра́дуйся, мглу́ грехо́вную озаря́ющая;
Ра́дуйся, мра́к неве́рия разгоня́ющая.
Ра́дуйся, из глубины́ неве́рия извлека́ющая;
Ра́дуйся, мно́гих в ра́зуме просвеща́ющая.
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
Конда́к 8
Стра́нно и сумни́тельно неве́рующим слы́шати, ка́ко от святы́я Твоея́ ико́ны чудеса́ источа́ются, одебеле́ бо се́рдце люде́й си́х, я́ко ви́дяще не ви́дят и слы́шаще не слы́шат и не обратя́тся к Тебе́, да исцели́ши и́х. Мы́ же, усе́рдно почита́юще чудотво́рный о́браз Тво́й, прекло́ньше коле́на, уми́льно любыза́ем его́, вопию́ще Бо́гу: Аллилу́ия.
И́кос 8
В вы́шних селе́ниих обита́ющи, и земны́х не оставля́еши, Богоро́дице Де́во, боля́щая бо и́нокиня Паи́сия узре́ в со́нном виде́нии святу́ю Твою́ ико́ну и гла́с от нея́ слы́ша: «А́з исцелю́ тя́». А́бие же поспеша́я, и́де на поклоне́ние Твое́й цельбоно́сней ико́не и, соверши́вши пред не́ю моле́бное пе́ние, исцели́ся от боле́зни своея́. Те́мже, восхваля́юще таково́е снисхожде́ние Твое́ к земноро́дным, воспева́ем Ти́ си́це:
Ра́дуйся, благочести́вых и́ноков и и́нокинь блага́я покрови́тельнице;
Ра́дуйся, иере́ев благогове́йных похвало́.
Ра́дуйся, во дни́ ско́рбнаго жития́ на́шего на земли́ ско́рая помо́щнице;
Ра́дуйся, во все́х беда́х и напа́стех ско́рая защи́тнице.
Ра́дуйся, а́лчущих корми́тельнице;
Ра́дуйся, жа́ждущим жи́зни питие́ неисчерпа́емое.
Ра́дуйся, сиро́т незри́мая воспита́тельнице;
Ра́дуйся, вдо́в заступле́ние.
Ра́дуйся, ле́ствице небе́сная, е́юже Бо́г к на́м сни́де;
Ра́дуйся, мо́сте, преводя́й су́щих от земли́ на не́бо.
Ра́дуйся, ключу́ ца́рствия Христо́ва;
Ра́дуйся, две́ри ра́йския на́м отверза́ющая.
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
Конда́к 9
Вся́каго естества́ а́нгельскаго превы́шши еси́, Богоро́дице Де́во, честне́йшая херуви́м, и сла́внейшая без сравне́ния серафи́м, предстоя́щи бо у Престо́ла Сы́на Твоего́ на небеси́, вы́ну мо́лишися Ему́ за ро́д христиа́нский. Не преста́ни моли́тися и о на́с, недосто́йных, у Престо́ла Вседержи́теля, да с ра́достию вопие́м: Аллилу́ия.
И́кос 9
Вети́и многовеща́ннии не возмо́гут по достоя́нию восхвали́ти преди́вная чудеса́, от святы́я Твоея́ ико́ны явля́емая, изумева́ет же у́м вся́к пе́ти Тя́, Богоро́дице. Ты́ же, я́ко блага́я су́щи. приими́ от на́с похвалы́ сия́:
Ра́дуйся, за христиа́н Сы́ну Твоему́ усе́рдно моля́щаяся;
Ра́дуйся, страну́ на́шу святы́м Твои́м омофо́ром покрыва́ющая.
Ра́дуйся, у́м на́ш к Бо́гу приводя́щая;
Ра́дуйся, злы́я на́ша по́мыслы искореня́ющая.
Ра́дуйся, се́рдце на́ше любо́вию к Тебе́ воспламеня́ющая;
Ра́дуйся, хоте́ние на́ше ко бла́гу наставля́ющая.
Ра́дуйся, гне́в Бо́жий, пра́ведно дви́жимый, ско́ро утоля́ющая;
Ра́дуйся, ко́зни духо́в зло́бы разруша́ющая.
Ра́дуйся, от нападе́ния и́х на́с охраня́ющая;
Ра́дуйся, во искуше́ниих пло́ти и ду́ха кре́пкая помо́щнице.
Ра́дуйся, па́дших воста́ние;
Ра́дуйся, к Бо́гу на́ше дерзнове́ние.
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
Конда́к 10
Спасти́ хотя́ сы́на своего́ пе́рвенца Игна́тия, одержи́маго боле́знию сме́ртною, боголюби́вая ма́ти его́, возне́сши сле́зную моли́тву Пречи́стей Ма́тери Бо́жией, даде́ обеща́ние отыдти́ на поклоне́ние чудотво́рному Твоему́ о́бразу, младе́нец же о́ный исцели́ся от сме́ртныя боле́зни в то́й ча́с; егда́ же прии́де в во́зраст, нача́ служи́ти Бо́гу в диа́констем чи́не, прославля́я Тя́, Богоро́дице, пе́сньми духо́вными, подвиза́я и на́с ве́рно служи́ти Бо́гу, вы́ну взыва́юще к Нему́: Аллилу́ия.
И́кос 10
Стена́ еси́ и щи́т и огражде́ние все́м велича́ющим Тя́, Богоро́дице, и чту́щим ве́рно чудотво́рную ико́ну Твою́, о́браз бо се́й белы́ничский, и́же с ве́рою носи́ на пе́рсех свои́х боголюби́вый во́ин Никола́й, сохрани́ его́ на по́ли бра́ни от смертоно́снаго уда́ра вра́жия. Сохрани́ и на́с, всеблага́я Влады́чице. си́лою свята́го Твоего́ о́браза от наве́та вра́жия и от находя́щих на на́с зо́л и напа́стей, да воспое́м Ти́ си́це:
Ра́дуйся, боголюби́вых во́инов на по́ли бра́ни ве́рная охрани́тельнице;
Ра́дуйся, блага́я и́х покрови́тельнице.
Ра́дуйся, в сраже́ниих стре́лы вра́жия отвраща́ющая;
Ра́дуйся, побе́ду и одоле́ние да́рующая.
Ра́дуйся, стре́лы лука́ваго от на́с отводя́щая;
Ра́дуйся, в бра́ни на́шей со ду́хи зло́бы на́м помога́ющая.
Ра́дуйся, от наве́тов вра́жиих на́с спаса́ющая;
Ра́дуйся, от клеветы́ и досажде́ния охраня́ющая.
Ра́дуйся, в семе́йствах ми́р и дружелю́бие устроя́ющая;
Ра́дуйся, ю́ных наста́внице.
Ра́дуйся, ста́рцев утеше́ние;
Ра́дуйся, су́етная гада́ния посрамля́ющая.
Ра́дуйся, в Бо́зе упова́ние иму́щих заступа́ющая;
Ра́дуйся, чту́щих Тя́ не постыжда́ющая.
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
Конда́к 11
Пе́ние всеумиле́нное приношу́ Ти́, Преблагослове́нная Богоро́дице Де́во, за неисче́тная Твоя́ благодея́ния, я́же излива́еши на́м от чудотво́рныя Твоея́ ико́ны; не преста́ни же моли́тися о на́с гре́шных у Престо́ла Сы́на Бо́жия, я́ко мно́го мо́жет моле́ние Ма́тернее ко благосе́рдию Влады́ки, Ему́же вси́ благода́рную пе́снь взыва́юще, ра́достно вопие́м: Аллилу́ия.
И́кос 11
Я́ко светоприе́мную свещу́ зри́м святу́ю Твою́ ико́ну, Богоро́дице, та́ бо, све́т невеще́ственный вжига́ющи, наставля́ет к ра́зуму боже́ственному, вся́ просвеща́ющи и вразумля́ющи ху́лящих и́мя Госпо́дне. Попали́ бо огне́м мо́лний жили́ще рабы́ Бо́жия Варва́ры, я́же дерзну́ поху́лити хра́м Тво́й, иде́же свята́я Твоя́ ико́на пребыва́ет, изре́кши зо́л глаго́л: «В се́м хра́ме бе́си жи́тельствуют». Вразуми́, Богороди́тельнице, и на́с, правосла́вно пою́щих Ти́:
Ра́дуйся, хули́телей святы́ни вразумля́ющая;
Ра́дуйся, уда́рами мо́лний и гро́ма и́х наказу́ющая.
Ра́дуйся, огне́м нечести́выя попаля́ющая;
Ра́дуйся, ве́рныя от огня́ запале́ния соблюда́ющая.
Ра́дуйся, ересе́й и раско́лов искорени́тельнице;
Ра́дуйся, правосла́вныя ве́ры догма́тов охрани́тельнице.
Ра́дуйся, мо́лние, ду́ши просвеща́ющая;
Ра́дуйся, я́ко гро́м враги́ устраша́ющая.
Ра́дуйся, купино́ неопали́мая;
Ра́дуйся, пла́мене страсте́й изменя́ющая.
Ра́дуйся, пла́мень гее́нский росо́ю моли́тв твои́х утоля́ющая;
Ра́дуйся, от огня́ гее́нскаго и ве́чных му́к спаса́ющая.
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
Конда́к 12
Благода́ть да́ти восхоте́в, дарова́ на́м Госпо́дь цельбоно́сную ико́ну Твою́, пред не́юже вознося́ще усе́рдная моле́ния, возводи́м у́м сво́й к Тебе́, первообра́зной Богоро́дице, прося́щи дарова́ти на́м блага́я и поле́зная во вре́менней жи́зни се́й, и в бу́дущей жи́зни блаже́нство безконе́чное, да воспое́м со а́нгелы и все́ми святы́ми на небеси́: Аллилу́ия.
И́кос 12
Пою́ще Твоя́ чудеса́, я́же оби́льно источа́еши на́м от святы́я Своея́ ико́ны, хва́лим Тя́, Пресвята́я Богоро́дице и, предстоя́ще ны́не пред пречи́стым Твои́м о́бразом со слеза́ми, умиле́нною душе́ю и сокруше́нным се́рдцем взыва́ем Ти́:
Ра́дуйся, засту́пнице усе́рдная ро́да христиа́нскаго;
Ра́дуйся, Ма́ти Го́спода и на́ша Ма́ти и покрови́тельнице.
Ра́дуйся, источа́ющая все́м на́м неоску́дныя ми́лости;
Ра́дуйся, избавля́ющая от вся́ких бе́д и напа́стей благонра́вныя и богобоя́щияся рабы́ Своя́.
Ра́дуйся, теле́с на́ших здра́вие;
Ра́дуйся, ду́ш на́ших спасе́ние.
Ра́дуйся, я́ко за все́х мо́лиши Сы́на Твоего́ и Бо́га на́шего;
Ра́дуйся, я́ко все́м твори́ши спасти́ся.
Ра́дуйся, избавле́ние все́х зо́л;
Ра́дуйся, поле́зная все́м да́рующая.
Ра́дуйся, я́ко Тя́ еди́ну наде́жду и́мамы;
Ра́дуйся, я́ко Ты́ еси́ боже́ственный покро́в рабо́м Твои́м.
Ра́дуйся, Богоро́дице Де́во, от белы́ничския ико́ны чудеса́ на́м источа́ющая.
Конда́к 13
О, всепе́тая Ма́ти, ро́ждшая Спа́са и Влады́ку Го́спода! Приими́ ма́лое моле́ние на́ше, пред чудотво́рным о́бразом Тебе́ ны́не возноси́мое, испо́лни ко бла́гу вся́ проше́ния на́ша, зри́ши бо на́ша сле́зы, слы́шиши на́ша во́пли и воздыха́ния, отовсю́ду одержи́ми есмы́ скорбьми́ и напа́стьми, и не и́мамы ины́я по́мощи, не и́мамы ины́я наде́жды ра́зве Тебе́, Влады́чице, изба́ви от вся́кия напа́сти в се́м ве́це о Тебе́ вопию́щих: Аллилу́ия, Аллилу́ия, Аллилу́ия.
(Этот конда́к чита́ется три́жды, зате́м и́кос 1 и конда́к 1)
Моли́тва Пресвяте́й Богоро́дице пред ико́ной Ея́ Белы́ничския
О, всеми́лостивая Госпоже́ Цари́це Богоро́дице, от все́х родо́в избра́нная и все́ми ро́ды земны́ми и небе́сными ублажа́емая! Припа́даем, поклоня́емся Тебе́ и смире́нно мо́лим Тя́: воззри́ ми́лостиво на предстоя́щия пред святы́м о́бразом Твои́м чудотво́рным, и приими́ моли́твы, со слеза́ми Тебе́ приноси́мыя от на́с, недосто́йных рабо́в Твои́х, и к Твоему́ о́бразу пе́ние возсыла́емое со умиле́нием, я́ко Тебе́ Са́мой ту́ су́щей, послу́шающей и подаю́щей с ве́рою прося́щим по коему́ждо проше́нию исполне́ние. Ты́, имену́емая Все́х скорбя́щих Ра́дость, услы́ши на́с, ско́рбных. Ты́, называ́емая Утоли́ моя́ печа́ли, утоли́ на́шу печа́ль. Ты́, Купино́ неопали́мая, сохрани́ ми́р и все́х на́с от вредоно́сных о́гненных стре́л врага́. Ты́, Взыска́ние поги́бших, не попусти́ на́м поги́бнути в бе́здне грехо́в на́ших. Ты́, Одиги́трие, укажи́ на́м пра́вый пу́ть ко спасе́нию. Ты́, Неувяда́емый Цве́те чистоты́, да́ждь на́м по́мощь, немощны́м плотско́ю стра́стию, и уцелому́дри на́с. Ты́, боголюби́вая Скоропослу́шнице, услы́ши в ча́с се́й моли́тву на́шу. Ты́, засту́пница усе́рдная, Ма́ти Го́спода Вы́шняго, Ты́, на́ша Ма́ти и наде́ждо, облегчи́ ско́рбь на́шу, немощны́м здра́вие да́руй, разсла́бленных и неду́жных исцели́ и от одра́ боле́зни возста́ви. От бе́сных бе́сы отгони́, оби́димых от бе́д изба́ви, вдо́в защити́, гре́шныя прости́, прокаже́нныя очи́сти, слепы́м зре́ние да́руй, ста́рость поддержи́, ю́ныя наста́ви, ма́лыя де́ти поми́луй, непло́дны от непло́дства разреши́, в семе́йствах ми́р утверди́, путеше́ствующим спутеше́ствуй, правосла́вным христиа́ном на враги́ побе́ду и одоле́ние да́руй, е́реси и раско́лы изкорени́, отпа́дшия от благочести́выя ве́ры на пу́ть пра́вый обрати́, страну́ на́шу ми́ром огради́, земли́ плодоро́дие да́руй, все́х же на́с от внеза́пныя сме́рти сохрани́ и вся́кия многоразли́чныя стра́сти уврачу́й, вся́ бо возмо́жеши хода́тайством к Сы́ну Твоему́ Христу́ Бо́гу на́шему.
О, всепе́тая Ма́ти, Пресвята́я Де́во Богоро́дице, не преста́ни моли́тися о на́с, недосто́йных, и к пречи́стому о́бразу Твоему́ со умиле́нием припа́дающих и со стра́хом и любо́вию на се́й взира́ющих, я́ко живе́й Ти́ су́щей. Услы́ши на́с, Влады́чице, на Тя́ по Бо́зе еди́ну наде́жду иму́щих. Пре́жде отше́дшыя отцы́ и ма́тери, бра́тия и се́стры на́ша упоко́й в селе́ниих святы́х, в ме́сте све́тле, в ме́сте зла́чне, в ме́сте поко́йне, иде́же не́сть печа́ль и воздыха́ние. Егда́ же приспе́ет и на́ше от жития́ сего́ отше́ствие и к ве́чней жи́зни преселе́ние, предста́ни на́м, преблагослове́нная наде́ждо на́ша, да́руй на́м христиа́нскую кончи́ну живота́ на́шего, безболе́зненну, непосты́дну, ми́рну и Святы́х Та́йн прича́стну, да в бу́дущем ве́це сподо́бимся вси́ ку́пно со все́ми святы́ми безконе́чныя блаже́нныя жи́зни во Ца́рствии возлю́бленнаго Сы́на Твоего́ Иису́са Христа́, Ему́же подоба́ет вся́кая сла́ва, че́сть и поклоне́ние со Безнача́льным Его́ Отце́м и Пресвяты́м, и Благи́м, и Животворя́щим Его́ Ду́хом ны́не и при́сно и во ве́ки веко́в. Ами́нь.