Кондак 1
Взбранная дружино воинства духовнаго, величающе скорби, узы и страдания ваша, со благоговением взирающе на подвиги и терпение святых, с любовию зовем вам: Радуйтеся, святии мученицы Сыктывкарстии и Коми-Зырянстии, за ны Христу молящиися.
Икос 1
Ангели, зряще, како гнев праведный Божий постиже землю Русскую и вся языцы ея от края и до края, како новое иго богоборческое тщится изгладити самое имя Христово из памяти человеческия, попирая олтари и предавая лютой смерти пастырей и овец Христовых, скорбяху о роде христианстем, от врага теснимем. Мы же, зряще таковая во всех пределех бывшая земли Сыктывкарския и Воркутинския, но и ведуще, яко ничтоже успеша нечестивии противу людей Божиих, зовем вси:
Радуйтеся, вернии страдальцы, в терпении подвиг совершившии; радуйтеся, лютость вражию посрамившии.
Радуйтеся, святителие, венцы своя мученическим бисером украсившии; радуйтеся, пастырие, верность свою всех Владыце явившии.
Радуйтеся, монаси, крепость адамантову врагом противуставившии; радуйтеся, отрекшиися мира и плоть ради Христа презревшии.
Радуйтеся, инокини благия, скорби велия любовию к Жениху растворившия; радуйтеся, святыя жены, на Северней Голгофе просиявшия.
Радуйтеся, святии мученицы Сыктывкарстии и Коми-Зырянстии, за ны Христу молящиися.
Кондак 2
Видяще тяжкая страдания верных, яже во узилищах, во изгнании претерпеша, зрим в сем промысл Божий о людех Своих: яко злато, в горниле искушено, отребляется от всякия нечистоты, тако Господь искуси верных Своих, да паче сияют во Царствии Небеснем и да благодарно вопиют Вседержителю: Аллилуйя.
Икос 2
Разуме князь века сего: колико воздвизашася слугами его Голгофы многи народу православному, толико уязвляша и попираша главу его доблии воини Царя Небеснаго. Темже и мы, взирающе на подвиги их, взываем сице:
Радуйтеся, ратоборцы преславнии; радуйтеся, победившии полки чуждих.
Радуйтеся, нищету и наготу добре претерпевшии; радуйтеся, поношения и биения ни во что же вменившии.
Радуйтеся, болезни смертныя кротко подъявшии; радуйтеся, даже до крове за Христа пострадавшии.
Радуйтеся, любовь Христову на ближних излившии; радуйтеся, оляденевшая сердца их верою воспламенившии.
Радуйтеся, святии мученицы Сыктывкарстии и Коми-Зырянстии, за ны Христу молящиися.
Кондак 3
Сила Вышняго укрепи избранныя Его не убоятися убивающих тело, души же не могущих убити, и яко бисером драгим украшены явишася земли Сыктывкарская и Коми-Зырянская подвиги исповедников и мучеников Христовых, весь цвет земли Русския в себе собравшия. Лучшии от сынов и дщерий за Христа добре зде подвизашася, и мучителей конечне посрамивше, вопиют ныне Богу: Аллилуйя.
Икос 3
Имущи от Бога талант веры православныя, земля Русская объюроде, в небрежение предадеся талант сей, в поношение и поругание вменишася светильники Господни; людие века сего возлюбиша паче тьму греховную, неже свет Святый, обаче соблюл есть Господь остаток Себе, праведныя Своя, имже воспоим:
Радуйтеся, светом Христовым в безумнем мире сиявшии; радуйтеся, благоуханием молитв места скаредная облагоухавшии.
Радуйтеся, «соль земли» миру явившии; радуйтеся, свидетельством истины лжу богоборцев упразднившии.
Радуйтеся, о безумии мучителей скорбевшии; радуйтеся, о прощении их Бога молившии.
Радуйтеся, безбоязненно веру пред гонители исповедавшии; радуйтеся, и самой смерти в лице дерзновенно смотревшии.
Радуйтеся, святии мученицы Сыктывкарстии и Коми-Зырянстии, за ны Христу молящиися.
Кондак 4
Бурю злобы воздвиже враг невидимый на людей Божиих, изгоняя верных из градов великих в селения малая и дальняя; но свет ваш, святителие и пастырие Христовы, в изгнании сущии, и теплота сердец ваших не можаху укрытися от народа православнаго, истаявающаго гладом духовным посреде безбожныя мглы, жаждущаго пети Богу: Аллилуйя.
Икос 4
Слышав Господь вопли чад Своих, о укреплении молящих, взыскуя пользы их, дабы не оскудела вера овец Его, не имущих пастырей в годину лютую, послал есть им единаго от ученик Своих, архиерея Своего Германа, града Вязники епископа, да наставляеми святым житием его, вопиют таковая:
Радуйся, святителю, многоскорбный путь подъявый: радуйся, многолетная изгнания претерпевый.
Радуйся, яко в веси Кочпонстей последнее пристанище обрел еси; радуйся, яко абие изгнаннии правды ради и зыряне вернии к любви твоей устремишася.
Радуйся, яко пением велелепным в церкви Пресвятыя Богородицы Владычицу мира славил еси; радуйся, яко и инех тому с любовию научал еси.
Радуйся, оплоте крепкий всем чадом и присным твоим; радуйся, свете теплый всем страждущим.
Радуйтеся, святии мученицы Сыктывкарстии и Коми-Зырянстии, за ны Христу молящиися.
Кондак 5
Боготечней звезде подобяся, приведен бысть, святителю Германе, промыслом Божиим в землю Зырянскую, и ту наставляше чад своих, в скорбех и обстояниих сущих: «Станем теснее ко Господу, тогда будем ближе друг ко другу, и никогда же прервано будет единство сие вопиющих Богу: Аллилуйя».
Икос 5
Видев, священномучениче Германе, тяжкая страдания людей православных в соблюдениих общих, во изгнании гладом гибнущих, горце уязвлялся еси сердцем о них, и аще что могий, в помощь им творил еси, паче же словом утешал еси, яко вся страдания сия, со благодарением носимая, приведут непреложно ко Владыце Христу; темже зряще милосердие и любовь твою, вопием ти:
Радуйся, кротостию сатанинскую злобу покрывавый; радуйся, с отцовскою нежностию ближним душевныя раны врачевавый.
Радуйся, учения святых отец верный последователю; радуйся, всем любящим тебе святый наставниче.
Радуйся, яко велия дарования твоя единому Богу посвятил еси; радуйся, яко и живот твой за Христа положил еси.
Радуйся, несокрушимую крепость духа явивый; радуйся, Властителю душ наших и единому блага Источнику верно послуживый.
Радуйтеся, святии мученицы Сыктывкарстии и Коми-Зырянстии, за ны Христу молящиися.
Кондак 6
Проповедницы вернии явишася священницы Христовы святых заповедей Его, и за слово сие, яко пшеница зрелая, пожати быша серпом нечестивых, яко пшеница Божия в житницы Его, идеже ныне в веселии воспевают Богу: Аллилуйя.
Икос 6
Возсияша подвизи ваши, пастырие земли Зырянския, Димитрие, Григорие и Николае: рыкаху нечестивии, вас обличающе, яко звери дивии, терзающе и предающе на смерть неповинныя; мы же воспеваем доблим страдальцем таковая:
Радуйся, Димитрие, пастырю усть-немския церкве Спасския, первый во священницех зырянских от безбожных пострадавый; радуйся, за слово обличения дел беззаконных огнем устреленный.
Радуйся, славне иерею Григорие, в Селибе подвизавыйся; радуйся, в Богоявленстей церкви паству верности Христу научавый.
Радуйся, дерзновенною проповедию вооружавыйся; радуйся, церкве селибския верный защитниче.
Радуйся, честный иерею Николае, аныбския и донския паствы учителю; радуйся, ревностный юных душ наставниче.
Радуйтеся, святии мученицы Сыктывкарстии и Коми-Зырянстии, за ны Христу молящиися.
Кондак 7
Хотящим врагом церковь Христову и самое имя христианское на земли потребити, никакоже возмогоша: омывающися кровьми мучеников, очищащися страданьми верных своих, возсияваше Церковь Божия в чистоте и доброте велией, и мужие инии небоязненно священный сан приимаху, да воспоют Владыце всяческих: Аллилуйя.
Икос 7
Новии людие, не токмо от роду священническа, любовию Божиею уязвленнии, возставаху за оскверненныя олтари и веру святую, отметающеся лжи богоборческия и последующе за Христом на Голгофу; темже слышат от нас таковая:
Радуйся, Стефане, земледелателю и воине, посем же в Сыктывкаре Крестовоздвиженския церкве ревностный священниче; радуйся, архиерея Германа верный почитателю.
Радуйся, Михаиле, важгортския Воскресенския церкве чтец благоговейный; радуйся, ныне на небесех Бога прославляяй.
Радуйся, Евфимие, в Выльгорте церкве Сретенския ради потрудивыйся; радуйся, о сохранении и благолепии дома Божия даже до крове ревновавый.
Радуйся, Павле, безбожныя лжи отвративыйся, кочпонския Казанския церкве богомолец усердный.
Радуйтеся, святии мученицы Сыктывкарстии и Коми-Зырянстии, за ны Христу молящиися.
Кондак 8
Странни явишася праведницы Божии людем омраченным, предпочетшим тленная блага любви Христове, еяже ничтоже есть сладчайше. Вы же, святии Божии, души своя положившии за Господа своего, вечная блага стяжавшии, в райских обителех ныне воспеваете Христу Жизнодавцу: Аллилуйя.
Икос 8
Вси вернии священницы Христовы познавше, яко пришла есть година праведнаго гнева Божия на землю Русскую, уготовишася явити веру свою и терпение святых. Совершающе небоязненно служение свое и паству свою окормляюще, подьяша крест свой и до конца понесоша; темже, добрии отцы наши, слышите от нас похвалы сия:
Радуйся, Павле Усть-Вымский и Ибский, протоиерею честнейший; радуйся, отче монахолюбивый, иноком во изгнании пристанище устроивый.
Радуйся, православие твердо сохранивый; радуйся, обновление Церкве лживое обличавый.
Радуйся, Ибская похвало, иерею Николае ревностнейший; радуйся, безумию тиранов противоборче неколебимый.
Радуйся, Иоанне, в Керчоме Иоанно-Предтеченския церкве паству правой вере научавый; радуйся, долг свой священнический добре исполнивый.
Радуйтеся, святии мученицы Сыктывкарстии и Коми-Зырянстии, за ны Христу молящиися.
Кондак 9
Всякая испытания тяжкая претерпе Невеста Христова, Церковь Божия, пройде сквозе огнь и воду, велия уничижения, да очистится от всякия скверны, и со дерзновением, сияющая, предстанет своему возлюбленному Жениху, вопиющи Ему в веселии: Аллилуйя.
Икос 9
Ветия многовещаннии не возмогут превзойти немногоученая пастырей словеса, проповедающих о правде Божии и кровию своею запечатлевающих верность свою; не можаше гонителей лютость зверская заградити уста их; темже и мы, взирающе на крестный подвиг их, воспоем с любовию таковая:
Радуйся, Всеволоде, семуковския Никольския церкве иерею; радуйся, твердо в православии стояти селян наставивый.
Радуйся, Иоанне, во многих церквах потрудивыйся; радуйся, в Мошьюге в церкви Собора Пресвятыя Богородицы служение свое скончавый.
Радуйся, Палладие, гамския Сретенския церкве пастырю благоговейный; радуйся, на ниве церковней делатель усерднейший.
Радуйтеся, иереи Божии вернии; радуйтеся, в годину лютую небоязненно слово Божие возвещавшии.
Радуйтеся, святии мученицы Сыктывкарстии и Коми-Зырянстии, за ны Христу молящиися.
Кондак 10
Спасти хотя заблуждшия овцы Своя, воздвиже Господь верных Своих и на подвиги их укрепи, и сии, презревше мир и вся суетствия его, в поношение миру бывше, любовию и терпением попраша вся ухищрения вражия, и победную песнь воспеша Всемилостивому Спасителю душ наших: Аллилуйя.
Икос 10
Стена есть Пресвятая Богородица всем девство ради Христа хранящим и в монашеском звании подвизающимся; Ею ограждаеми, сугубо монаси подвизашася, да зело честни будут Подвигоположнику Христу, яко агнцы с радостию течаху на заколение, да пред лице Божие явятся. Сего ради с любовию воззовем к ним тако:
Радуйся, Платоне, иеромонаше изряднейший, во ульяновстем Троице-Стефановем монастыри с братиею подвизавыйся; радуйся, по игумене Амвросии, в узы заключением, монастыря настоятелю.
Радуйся, с братиею обители в Северодвинский стан работный, жилою железною огражденный, нуждею приведенный; радуйся, тяжкая страдания тамо добре претерпевый.
Радуйся, посем часовския Спасския церкве священноиноче; радуйся, прихожаном образе верности православию.
Радуйся, Мелетие, обители Троице-Стефановы казначею; радуйся, и среди мира служение иерейское не оставивый.
Радуйтеся, святии мученицы Сыктывкарстии и Коми-Зырянстии, за ны Христу молящиися.
Кондак 11
Пение всякое не довольно есть изобразити, како и немощное естество женское противуста мучителем, како девы, жены и старицы посрамиша гордыню превознесенную, немолчно воспевающа Богу: Аллилуйя.
Икос 11
Светоприемныя свещи явишася инокини и жены мирския, горящия верою и любовию ко Христу Спасителю, со дерзновением начата попирати главу змиеву, во уметы вменяюща вся страхования и ярость его; тем же воззовем к ним сицевая:
Радуйся, инокине честная Елисавето, в кылтовстем Крестовоздвиженстем монастыри возраставшая; радуйся, по упразднении обители твоей в выльгортстей Сретенстей церкви послушание чтицы исправлявшая.
Радуйся, со дерзновением безбожную власть обличавшая; радуйся, силу духа пред мучители показавшая.
Радуйтеся, инокини, в мире гонимы бывшия; радуйтеся, обеты своя пред Богом соблюдшия.
Радуйтеся, безвестныя подвижницы, Богу же знаемыя; радуйтеся, мученицы безкровныя и жизнь за Христа положившия.
Радуйтеся, святии мученицы Сыктывкарстии и Коми-Зырянстии, за ны Христу молящиися.
Кондак 12
Благодать сугубую восхоте Господь даровати Русской Церкви: да явит свою верность Владыце не токмо во дни благоденствия, но и во дни гонений, якоже рече святый исповедник, патриарх Всероссийский Тихон. Желаша нечестивии пролияти кровь святых аки воду, но паче наполняшеся Царствие Божие новыми святыми мученики и исповедники Христовыми, воспевающими Богу: Аллилуйя.
Икос 12
Поюще велий сонм святых мучеников, иже восташа в земли Зырянстей северней и кровьми своими явишася пред Богом жертва красная за безумие рода своего, людий своих, да и тии, милостию Божиею просвещени, взирающе на подвиг их, обратятся ко Господу, ублажаем вас сице:
Радуйтеся, очищение огненное подъявшии; радуйтеся, в покой Христов путем узким вшедшии.
Радуйтеся, посреде волков аки агнцы закалаеми бывшии; радуйтеся, подвигом добрым Христу угодившии.
Радуйтеся, жизни своя за имя Христово положившии; радуйтеся, честь сугубую от Царя славы восприявшии.
Радуйтеся, не боятися лютости мучителей нас научающия; радуйтеся, на всякий час ко исповеданию Христа готови быти нас наставляющия.
Радуйтеся, святии мученицы Сыктывкарстии и Коми-Зырянстии, за ны Христу молящиися.
Кондак 13
О, святии доблии новомученицы и исповедницы Сыктывкарстии и Коми-Зырянстии, добре подвиг совершившии и веру соблюдшии! Ныне предстояще престолу Царя царствующих и Господа господствующих и с лики святых веселящеся, молите о нас Христа Бога, да прегрешений оставление подаст душам нашим и велию милость, да спасаеми молитвами вашими радостно возопием Богу: Аллилуйя.
(Сей кондак чтем трижды, затем икос 1 и кондак 1)
Молитва
О, святая дружино новомучеников и исповедников, в Севернем краи подвизавшиися, землю Сыктывкарскую и Коми-Зырянскую кровьми своими освятившии и Христу Богу зело угодившии! Яко имуще велие дерзновение ко Спасу, молите милостиваго Бога, да прегрешений оставление подаст душам нашим. Молим вас, ходатайствуйте за нас, грешных и немощных и ленивых, да простит Он наше нерадение о своем спасении, да укрепит и вразумит, како нам жити в годину тяжкую, грядущую на вселенную.
Вемы бо, яко по грехом нашим достойни есмы праведнаго гнева Божия, во еже сожещи нас и осудити на муки вечныя, но молим вас, новомученицы и исповедницы Коми-Зырянстии, да будете нам помощницы и наставницы, егда нынешнии богоненавистницы уставят и нас, аможе стоясте нозе ваши, идеже вы свой подвиг совершисте и спасение улучисте. Много бо может молитва праведнаго поспешествуема, тако да вашими молитвами и молитвами Пречистыя Владычицы нашея Богородицы и Приснодевы Марии вся добре претерпим за Христа, да Христа приобрящем, подвизающеся, аще Ему изволится, даже до крове, да спасение улучивше вашими святыми молитвами, радостно воспоем с вами и со всеми святыми, во обителех небесных, Отца и Сына и Святаго Духа, Троицу Единосущную и Нераздельную, ныне и присно и во веки веков. Аминь.